2026 წლის 5 სექტემბერს, საქართველოს მშვილდოსნობის ეროვნული ფედერაციის ოფისში („დიდუბე პლაზა“) ჩატარდა ფედერაციის გამგეობის მორიგი სხდომა, რომელსაც უძღვებოდა ფედერაციის პრეზიდენტი სიმონ ნოზაძე.

სხდომაზე გამგეობის წევრებმა დღის წესრიგით გათვალისწინებული ყველა მნიშვნელოვანი საკითხი დაწვრილებით განიხილეს და მომხსენებლების ანგარიშები მოისმინეს:

• ხათუნა ნარიმანიძის სახელობის საერთაშორისო ტურნირის შეჯამება: ხათუნა ნარიმანიძემ და თამაზ ფუტკარაძემ წარმოადგინეს ბათუმში (25-27 აგვისტო) გამართული ტურნირის შედეგები. საკითხი განხილულ იქნა 7-წლიანი სტრატეგიული განვითარების გეგმის მე-7 მიზნის („კლუბური სისტემის რეფორმა და A, B, C კატეგორიებად რანგირება“) ჭრილში, კლუბ „ხათუნას“ მიერ A კატეგორიის სტატუსის მოსაპოვებლად გადადგმული ნაბიჯების შეფასების კუთხით.გამგეობამ ორგანიზაციული თვალსაზრისით ტურნირი დადებითად შეაფასა
• მატერიალურ-ტექნიკური ფასეულობებისა და დოკუმენტაციის გადმოცემის პროცესი: ბესიკ ობოლაძემ გამგეობის წევრებს გააცნო შუალედური ანგარიში ინვენტარიზაციის, საბუღალტრო აღრიცხვისა და ყოფილი ფაქტობრივი მატერიალურად პასუხისმგებელი პირებისგან მასალების გადმოცემის მიმდინარეობის შესახებ. გამგეობამ აღნიშნულ საკითხზე მიიღო შესაბამისი დადგენილება (დაგენილება იხილეთ ფედერაციის ოფიციალურ ვებ გვერდზე).
• კომიტეტების საქმიანობის ანგარიშები და 2027 წლის საბიუჯეტო განაცხადები: გიორგი გორდეზიანმა და თამაზ ფუტკარაძემ წარადგინეს მწვრთნელთა და საშეჯიბრო-საორგანიზაციო კომიტეტების 2027 წლის სამუშაო ხედვები, სამოქმედო გეგმები და შესაბამისი ფინანსური მოთხოვნები.
• 6 თვის ფინანსურ-ტექნიკური ანგარიში: არტემ სანიშვილმა გამგეობას წარუდგინა გასული 6 თვის განმავლობაში განხორციელებული ფინანსური ოპერაციებისა და ტექნიკური საქმიანობის შესრულების დეტალური ანგარიში.
• 2027 წლის ყრილობის მოწვევა და მოსამზადებელი ღონისძიებები: სიმონ ნოზაძემ და ბესიკ ობოლაძემ ისაუბრეს 2027 წლის თებერვალში ჩასატარებელი ყრილობის დაგეგმვასა და დღის წესრიგზე (პრეზიდენტისა და გენერალური მდივნის ანგარიშები). გადაწყდა-ფედერაციის მორიგი ყრილობა ჩატარდეს 2027 წლის 1 (პირველ) მარტს. გადაწყდა გენერალური მდივნის ხელმძღვანელობით სამუშაო ჯგუფის შექმნა, რომელსაც დაევალება წესდების ახალი რედაქციის პროექტის მომზადება.
• 2027 წლის ღონისძიებათა კალენდარული გეგმა: არტემ სანიშვილმა გამგეობის წევრებს მიაწოდა ინფორმაცია საქართველოს სპორტის სამინისტროში 1 სექტემბერს წარდგენილი 2027 წლის კალენდარული გეგმის საბოლოო პროექტის შესახებ.
• სტრატეგიული განვითარების გეგმის 12 პრიორიტეტზე ბიუჯეტის გადანაწილება: გაიმართა პირველადი კონსულტაცია და დისკუსია სამინისტროს მიერ დამტკიცებული საბიუჯეტო ასიგნებების პროპორციულ გადანაწილებაზე სტრატეგიის 12 ძირითად მიზანს შორის.
• მთავარი მწვრთნელის 6 თვის მუშაობის ანგარიში: გამგეობამ განხილვის გარეშე ცნობად მიიღო ეროვნული ნაკრების მთავარი მწვრთნელის მიერ გაწეული 6 თვის მუშაობის ანგარიში.

სხდომა პროდუქტიულ რეჟიმში წარიმართა და მიღებულ იქნა შესაბამისი გადაწყვეტილებები ფედერაციის შემდგომი განვითარებისა და 2027 წლის მოსამზადებელი ეტაპების უზრუნველსაყოფად.