საქართველოს მშვილდოსნობის ეროვნული ფედერაციის პროექტი „ოლიმპიური რეზერვი – გზა 2032“ წარმატებულად გრძელდება. 11 ოქტომბრიდან 12–14 წლის 4 ახალგაზრდა ქართველი ტალანტი თურქეთში იმყოფება, სადაც ვიზიტის პირველი ეტაპი ესკიშეჰირის ტექნიკური უნივერსიტეტის (ESTÜ) სპორტული მეცნიერებების ფაკულტეტის ბაზაზე გაიარეს.

ესკიშეჰირში სპორტსმენებს ჩაუტარდათ კომპლექსური სპორტულ-სამედიცინო დიაგნოსტიკა, ფიზიკური, ტექნიკური და ფსიქოლოგიური მზადყოფნის ღრმა შეფასება. აღნიშნული ინიციატივა საქართველოს მშვილდოსნობის განვითარების 7-წლიანი სტრატეგიის (დამტკიცებული 2026 წლის 1 მარტს) მე-6 მიზნის — „მაღალი მიღწევების სპორტი“ — საკვანძო ნაწილია და „სპორტის, ახალგაზრდობისა და ტურიზმის ფონდის“ მხარდაჭერით ხორციელდება.

შთამბეჭდავი შედეგი სადებიუტო ტურნირზე

ინტენსიური საწვრთნო და სამეცნიერო-სადიაგნოსტიკო კურსის დასრულების შემდეგ, ქართული დელეგაცია თურქეთის დედაქალაქ ანკარაში გაემგზავრა, სადაც ახალგაზრდა სპორტსმენებმა თავიანთ კარიერაში პირველ საერთაშორისო ტურნირში მიიღეს მონაწილეობა.

ტურნირი 18-მეტრიან დისტანციაზე ჩატარდა და მასში ასაკობრივი შეზღუდვა არ არსებობდა. მასპინძელი მხარე თურქეთის წამყვანი კლუბებით — Zen Archery (კერძო კლუბი) და Ankara GSM (სახელმწიფო კლუბი) — იყო წარმოდგენილი.

იმის გათვალისწინებით, რომ 12–14 წლის ქართველ მშვილდოსნებს თავიანთზე ბევრად უფროს და გამოცდილ სპორტსმენებთან მოუწიათ პაექრობა, მათ მიერ ნაჩვენები შედეგი უდავოდ შთამბეჭდავი და იმედისმომცემია:

• გუნდური ჩათვლა: საქართველოს ნაკრებმა მეორე ადგილი და ვერცხლის მედლები მოიპოვა.

• პირადი ჩათვლა: ანა სურგულაძემ ბრწყინვალედ ასპარეზობით ფინალამდე მიაღწია და მეორე ადგილი დაიკავა (აღსანიშნავია, რომ ანას ფინალში 18 წლის გამოცდილი მეტოქე შეხვდა).

მადლობა პარტნიორებსა და მხარდამჭერებს

საქართველოს მშვილდოსნობის ეროვნული ფედერაცია ულოცავს ახალგაზრდა სპორტსმენებს ამ პირველ, მნიშვნელოვან საერთაშორისო წარმატებას!

ფედერაცია განსაკუთრებულ მადლობას უხდის:

    პროექტის-,,ოლიმპიური რეზერვი-გზა 2032"-ის ამ ეტაპის გენერალურ სპონსორს-სპორტის, ტურიზმისა და ახალგაზრდობის ფონდს.

• მწვრთნელებს: ალექსანდრე მეჟევიძეს, ბექა გუგეშაშვილს, მალხაზ მახარაშვილსა და მანანა ცხვარიაშვილს გაწეული დაუღალავი შრომისთვის.

• დელეგაციის ხელმძღვანელს: ბატონ არტემ სანიშვილს, რომელიც ამ ვიზიტის ორგანიზატორი და ზოგადად, პროექტ „ოლიმპიური რეზერვის“ ერთ-ერთი  შემოქმედია.

• საერთაშორისო პარტნიორებს: თურქეთის მშვილდოსნობის ფედერაციას, ესკიშეჰირის ტექნიკურ უნივერსიტეტს, სპორტის ფაკულტეტის პერსონალს და კლუბ Zen Archery-ს.

• პროფესორ ჰაირი ერტანს (Hayri Ertan) და მის მეუღლეს — პროექტის ადგილზე კოორდინაციისთვის, სამეცნიერო მხარდაჭერისა და ქართული დელეგაციისადმი გამოჩენილი თბილი, გულითადი მასპინძლობისთვის.

ახალგაზრდა მშვილდოსნების ეს წარმატებული ნაბიჯი კიდევ ერთი დასტურია იმისა, რომ სწორი სამეცნიერო-საწვრთნო მიდგომითა და საერთაშორისო გამოცდილებით, 2032 წლის ოლიმპიური მიზნები სრულიად რეალურია!